لا تدمعي يا عين

الكاتب: نصير احمد الريماوي

لا تدمعي يا عين
على اللي غادر وبعتم اللّيل سار
وما قال للوطن صباح الخير
ولا للأهل والدّار
وجسمه من عذاب بني صهيون تَحرر
وصوته صدح باسمك يا فلسطين وكبّر
وسلّم الرَوح للخالق الباري
وبلدنا على فراق الشّهيد تتحسر
لا تبكي يا أمي فالله هو الباقي
وروحي من فوق السّما يا أمي ترعاكي
عند خالقها في الجنّة راح تُحشر
يا ابني للوطن ضحيت بالرَوح
راسك ما حَنيت لسجانك يوم
وأنت في زوايا السّجن محبوس
وكنت قاهرهم يا ابني ودوم
بصمودك راح نظل رافعين الرّوس
حقنوا هالجسد يا ابني بِسَمّ السّرطان
حتى يخلصوا منك وعرشهم ينصان
بوصيكي يا أمي أنا بهالوصيّة
حافظوا على هالأرض وتُربتها الأبيّة
هذا وطنّا بِينْشَرا بأرواح
حتى نحرره من نير العبوديّة
عبوديّة هاليهود بني صهيون
ومن وراهم جيوش استعمارية
يا أمي هالوطن غالي علينا
وعلى أرضه ومن تُرابه تربيّنا
بأرواحنا نفديه حتى تشرق شموسه
ويطلع فوسط اللّيل هالقمر يبوسه
يضوي بأنواره عتمة ليالينا ..
أنا في يوم يا أمي ما هُنت
ولا من عذاب السّجن سَلّمت
ظَلّيت صامد وبهالرَوح ضَحيت
ووقفت مثل الأسد وهالعدو تحدّيت
وف يوم ما خفت من سَطّوة الموت
ولترابك يا فلسطين بالرَوح ما ضَنَّيت
والشهادة صارت مُنيِتي علشان
أقهر عدوي وأقهر السّرطان
وهالوطن يا أمي فيوم ما ينهان
رشوا على كفني من ميَّة بلادي
ولفّوا هالجسد بثياب أجدادي
علينا هالوطن دوم بينادي
نفديه بالغالي وما نخاف هالعادي
ولوّني رمسي بألوان العلم
بورود من كلّ لون واكتب يا قلم
بودعك يا أمي بهاليوم....... الوداعَ
يا حيف على اللي فرَّط بالوطن وباع
لا تدمعي يا عين بكرة الأمل يكبر
وبزنود شبابنا الأحرار هالوطن يتحرَّر

__________
10/11/2015م
ملاحظة: مهداة إلى روح شهيد الصراع مع السرطان الأسير المحرر"غسان عباس الريماوي" الذي وافته المنية فجر اليوم في مستشفى الحسين للسرطان بعمان عن عمر يناهز 27 عاما، وقد أصيب بالسرطان إبان اعتقاله في سجون الاحتلال.