أغنية؛ بين اثنين (المتشائم والمتفائل)

الكاتب: المتوكل طه

نار بقلبي وقهر وموت
ووردة مغموسة بالدمّ
وهدم وقيد وبحّة صوت
وكلمة غَمّ ولقمة سَمّ
ولسّه بتحكي؛ عَمّ بتفوت!
ويومي ظُلمه وليلي هَمْ ؟
وين العالم والقانون
حتى يتوقف لِجْنون
ويرجع للحقل الحسّون
وينبت في الخدّ الحنّون
كلّو مسكّر.. كلّو معكّر
وسنيني عتمة تابوت ..
والساكن ظالم طاغوت ..
معقول إلْ صاير معقول
حرب وفتنة ودقّ طبول
ومقتول يودّع مقتول
ما حدْ مهتمّ بها الحال
ولا مِن يوصل هالمِرْسال
ولا جفرا ولا موّال
ودلعونا وظريف الطول ..
يا ظريف الطول وين الفرح وين
جاري في السجن وولاده شهيدين
ومِن كثر الهموم عين تبكّي عين
ودخْلَك يا ظريف وين احبابنا
يا ظريف الطول راحوا من سنين
واللاجئ مشتاق للصبر والتين
والبحر مهجور والسما حنين
والمركب ما عاد يرسي بشطّنا
***
يا خَيّي ! بهالوطن كُنّا وعَمْرنا
قبل ما يلْفي ويكَبّر عُمَرنا
وعُمْرُه القهر ما يهزم عُمُرْنا
لأنّا الأصل والباقي سراب

إحنا اللّي نبني البيوت
صوت بيصدح بعد سكوت
الشمس بتطلع رغم العتمه
بتبوّس حبّات التوت
والشنّار بيدرج دَرْج
والمعشوقة بتغنج غَنْج ..
وبابها انشقّ بإيدها ورَقّ
وقلبي بحُبّها صاحي ودقّ
وعَبيتها العروس تفوت ..
بتطرح منثور بنيسان
مفَرِّع نَخْلو في بيسان
وثُوبُه رانخ بالنعمان
مرصّع بنجوم الياقوت ..
وناعم ناعم هالريحان
" شمّوا ولمّوا هالريحان
تسلملي إمّو هالريحان
بصدري ضمّو هالريحان
وبإيدي لِمّو هالريحان
ناعم ناعم هالريحان"
وما بدنا سجن وسجّان
يبقى ع طول الزمان
حريّة .. وما عنها رجوع
ما يضيع الحقّ المشروع
من عكّا لعسقلان
ومهما تحكي ومهما تقول
رَح يعلى صوت اليرغول
بدلعونا وظريف الطول ..
على دلعونا يا ما احلى بلادي
معمورة وخضرا بوجود ولادي
وعُمْرُه ما يطوّل ليل الأعادي
والقدس حُرّة أمّ الزيتونا
من ساحل حيفا لَ بحر غزّة
اهتزي يا أرض كنعان اهتزّي
مَجْد وكرامِه وحُريّه وعِزّه
ودولة عداله وعَوْدِه ميمونا