إيران والعرب؟!

بصراحة، معاهم حق العرب يسخروا من إيران، ويسخسخوا على روحهم من الضحك، ويسألوا: فين الرد الإيراني؟.
معاهم حق، لأن العرب تارهم ما بينامش لتاني يوم.. بياخدوا تارهم أسرع من الصوت والضوء.. شفتوا السرعة إللي رجعنا بيها أولى القبلتين، وكنيسة القيامة؟ شفتوا السرعة إللي أغثنا بها أهل غزة، وأدبنا بيها الصهاينة على جرائمهم؟ شفتوا السرعة إللي دعمنا بيها المقاومة، بالمال، والسلاح، والسياسة، والإعلام؟ شفتوا السرعة إللي ضربنا بيها سد النهضة؟ شفتوا السرعة إللي استردينا بيها أم الرشراش، وسبتة ومليلية، ولواء الاسكندرون، والجولان؟ شفتوا السرعة إللي طردنا بيها الاحتلال الأمريكي للعراق وسوريا؟ شفتوا السرعة إللي دمرنا بيها القواعد العسكرية الأمريكية في الوطن العربي؟ شفتوا السرعة إللي أنهينا بيها الاحتلال التركي لسورية؟ شفتوا السرعة إللي انتقمنا بيها لليبيا من الناتو؟ شفتوا السرعة إللي انتقمنا بيها للصومال؟.
أنا موش فاهم؟ ليه إيران ما بتتعلمش من بأسنا، وقوتنا، وسرعتنا؟.
ليه إيران ما بتتعلمش نضالنا، وكفاحنا في كامب ديفيد، ووادي عربة، وأوسلو، وأبراهام؟ ليه ما بتتعلمش من تاريخنا؟ وإزاي ما عملناش (حطين) غير لما جالنا واحد كردي يقودنا.. وماعملناش (عين جالوت) غير لما جاء شوية مماليك يسوقونا.. إزاي إيران ما تاخدناش قدوة وتتعلم من أمجادنا سنة ١٩٤٨، لما راح ستة جيوش عربية عشان يحاربوا فضيعوا فلسطين؟.